تقدام الحنة مكتوبة العروس مكتوبة
جاء موسم لفراح وجاو ياماتو
نمسي عليكم بهدية من اليامات اللي فاتو
ريحة زمان، يامات الطبع والشان كي كان الفرح بقانتو
جبتلكم تقدام حنة العروس اللي حب يوللي للعوايد
من عندي الجهد ومن عندكم إن شاء الله الرد
هذا تقدام الولد وان شاء الله يامات ونزيدو تاع البنية
كلمات تقدام الحنة على الطريقة العاصمية
*بسم الله بسم الله، بسم الله يبدا البادي 2
محمدنبينا هو خير الاسيادي
*محمد محمد صلوا يا الامة عليه 2
سيدنا وحبيبنا يفرح من صل عليه*
حني حني يا الحناي والحنة في طبسي البلار 2
يربطها سيدي وليدي بجاه النبي المختار
* خويا قاعد فالكرسي وصحابو عشرة دايرين بيه 2
خدوبنعمان فاتح ولا دم العيد رشوه بيه
*خويا برنوس الحرير يا من زين ياماتو 2
خويا يربط فالحنة والحطة واتاتو
يرفد عين ويحط عين شاف اللبة جاتو
*
وانت يا ياخويا اصرف دراهمك لاتخاف2
جبنالك طفلة ولية حمامة على رأس الكاف
* خويا قاعد فالكرسي وصحابو قدامو 2
ماسلف مادار الدين جبدهم من تزدامو
*وليدي ياشندال الذهب والشمعة واتاتو 2
ربي يخليلي وليدي ويكمل بحياتو
*ياسيدي عبد الرحمن يامول القبة العالية 2
اتهلالي في وليدي ووعدتك راهي جاية
* امشينا طريق بعيدة بكرارسنا يرعدو 2
جبنا لخويا لالات النسا خمسة في عينين العدو
*يابابا ياحنيني والحقرة قتالة 2
خويا عزيز الشان وليد الرجالة
* خويا كمل الحنة وبعدولو مالطريق 2
خويا خويا مفشش مايحملش الذيق
*هذا الريح مع السحاب وزهو الليل بنجومو 2
يامحلا لمة لحباب يالوكان يدوم
* يطيكم الصحة ياللي جيتونا اليوم حنيينا لخويا وغدوة لوليداتكم
وشباحها الولاول
*
*