- 01حليت باب الجنان لقيت الملاح رقود تنهدت الدالية و تحرك العنقود قال القمر فالسماء نكشف على السحاب يذوب خلي الحبيب لحبيبو و اللي في قلبو حاجة الله يبلغ المقصود .
- 02 نزلت لقاع البحر خرجت لي جنية قالت لي وشبيك يا لالا مهمومة تكلميافتحي قلبك ليا قلت لها يا مولاتي هذاك حبيبي أداوه عليا قلبي معاه و قلبو معاها هيا
- 03يا لي جايا من العين و بيدك مليتي السلة سبحان من أعطاك أزين و زاد فيبهاك ذيك الحلة .
- 04 النور يا النور و النور عينيا طبطبوا على الباب و جابو لي اللي عزيز عليا راني نتمنى من ربي يجي يطلب يدي من ماليا .
- 05 جاز عليا شباب في يده منديل ازرق و ششيته معنقرة و لبسته تبرق عليه نسمح في الولد و عليه نطلق وعليه نخلي البلاد ونردها خندق .
- 06 الشمعة يا لشمعة يا لشمعة الضواية لو كان نعرف وشبيك نمسح هذيك الدمعة من خديك و نرد وجهك مرايا يا ربي يا معبود اقبل دعاية يا رجع لي زهو الزمان ويعيا الحبيب قاعد معايا .
- 07 اطلعت للسطح و فرشت زربية حرقت حر قوس الذهب و حرقست عينيا أفرحي يا يما سعدي ولا ليا نستشفي فالعدو كما استشفى فيا
- 08 لو كان السعود ينغرسو نغرس ميات عود و عود في طية وحدي لكن السعود في يدك يا معبود يا سقام السعود سقم لي سعدي الناس الكل بحبيبهم وأنا غريب في هذا الدنيا وحدي .
- 09 فاطمة يا فطوم وين ما تكوني نرسلك مرسول إذا سكنتي البحر نرسلك عوامة وإذا سكنتي السماء نرسلك حمامة و إذا سكنتي القبر يحاسبك مولانا .
- 10 علاش يا لالا التخمام رحمة الله واسعة و كبيرة لو كان جات بالكلام نتحدثو و نعطوك تدبيرة بصح كل شي بالمكتوب ويعيا و الخير يبان و تزول عليك الهموم و تروح الحيرة .
- 11 أعلميني يا لالا نهار تروحي لحمامك نرفدلك السلة و نمشي قدامك ندورعلى يمينك و نزيد على شمالك و نبقى لك خديم و طايع على طول زمانك .
- 12 السفينة اللي جات باش نلاقيها باللوز و السكر نرش سواريها و الورد والياسمين نهديه للركاب فيها و بالمسك و العنبر نعطر أماليها .
- 13 يا لشمس الضوايا يا العالية في سماك لو كان صبتك مرايا و نشوف وجهي بضواك يعود ربحي و غنايا و يقسم سعدي ذاك
- 14في الساقية الماء يجري و الحشيش نابت متخالف بالشوك مليت حجري من هذاك الراي التالف كي غبت و غاب زهري و لا اللي يجيني خايف .
- 15 أقعدت تحت النخلة قالولي دقلة نور جات أدور أطلعت فوق النخلة و بالعسل رشيت الصور معاه المعيشة تحلى حبيبي الساكن في القصور .
- 16 جيت ساميت البحر شفت الحوت يعوم عرفت ما عندي زهر في ذا الحظالمحموم كي غاب ضي القمر ما ردت ضي النجوم .
- 17 شجرة ياسمين نايضة في وسط الغرفة عروقها سكنجبير و أغصانها قرفة والله ما ننساك يا زينة الوقفة
- 18 ما نكلش القارص لو يشهيني و ما نخذش الشيخ لو كان يغنيني ناخذ شاب صغير قده يواتيني .
- 19 دارنا في الجبل مقبلة مكة و فراشها حرير طبقة على طبقة و مصباح الفضة يشعل ما يطفى .
- 20
- غرست ياسمينه في وسط الدار عروقها سكنجبير و أطرافها نوار يما يا يما محلى عشق الجار العين تخز في العين و القلب شاعلة فيه النار .
- 21 أصلك أصلك و ما ينفع غير الصح مولاة النية الصافية عليها ربي يفتح أطول و لا تقصر يجيها السعد و الربح
- 22 يا مولاة القلب الكبير ربي يعطيك و يوسع عليك ما عندك لا ذهب و لا حرير و أنت دايما زاهية و ربي مسهلك ما دريت من حيلة ندير باش نكون مثلك .
- 23 التمر و الحليب في طبق وسط الخيمة نهديهم للحبيب باه يوالف ديمة ما يعزش اللي في الجيب هذاك زوجي يالميمة .
- 24
- يا لتفاح الجربى يا مكر بع محلاك نهديك أنا لحبيبي و بيه نرفع اشناك كي حن عليا ربي أرافقو أنا وياك .
- 25
- يا لساكنة في الخيمة و الريح جاني قبلي ردي أوراقك ديمة لا يولي الريح غربي .
- 26 في الدار صندوق مخبي في وسطو ذهب و جوهر مرجان و روبا قظيفة قالولي اماليا لمن مخبيه قلتلهم لهذيك مولاة الشان مولاة المشية الظريفة .
- 27 يا لالا يا لالا يا مولاة القلب القاسي حني على حبيبك يالي طيرتي مني نعاسي ملي شفتك راني نتعذب عليك نعادي اماليا و قاع أحبابي وناسي
- 28 حكمت الطير بتكة الحرير و ما ظنيته يطير من بعد ما والف خلى قفصي و عمر قفص الغير و اقعدت أنا في البحور نتمشى تالف لا سواري لا قلاع لا وجدت مقاذف هذ الزمان يعطي و يخالف .
- 29
- علي يا علي يالي سومك غالي من صابك تجي لعندي نفرشلك مطرح حرير و نغطيك بيزاري .
- 30 عيطت على سيد الملاح صبت الناس رقود هزيت الدالية طاح منها عنقود النجوم قالت النجوم نحكي و قال القمر نذوب اصبر يا قلبي ياك كل شي مكتوب.
- 31
- يا للي ملكتنني بزينك يالزايدة في عذابي في الليل نومك و في النهار نترجاك قوليلي غير كليمة يرحم اللي رباك .
- 32
- و ين الطريق اللي فيها محبوبي جيبولي التراب من ثمة نشريه نعمله جعيبة فيمكتوبي و إذا مرضو عينيا نكحل بيه حبيبي ما يسمح فيا و أنا ما نسمح فيه .
- 33 ذاك الحمام اللي محبوس في السجنة يعيا و يفرج ربي و نرجعوا خير من اللي كنا
- 34 يا قاعدة في الجنينة و القرقاف حذاك في النهار نتفكرك و في الليل نترجاك قلبي وصل لعندك و عينيا حشمو من بهاك ذاك البصر المفلق يما واش فيه راه القلب تعلق لمن نهديه لا طيور تزقزق لا مخبيه .
- 35 شجرة على طرف البير و أعراقها دلايا يما شفت الطير وجهوا كي المرايا عليه لعقاد تسير و عليه نطوي الثنايا
- بالخير مسيتكم...و بالورد و الريحان جيتكم...و في ليلة العيد نحييكم...ربي يتقبل منا و منكم
- هدي لعبة جمييلة جدا وممتعة هي لعبة جزائرية قديمة من التراث الجزائري
- اخبركم كيف كانت تلعب.. كانت تلعب في المناسبات الخاصة سهرات رمضان الاعياد عاشوراء الافراح
- والمناسبات كانت السيدات والعجائز و البناااااات الشابات تجلبن اناء من الفخار الذي يسمى بالبوقال مملوء
- بالماء وكل وحدة تضع في البوقال خاتمها الخاص لي دايما ترتديه والعجائز تحضر البوقالة والبوقالة هي كلام
- باللهجة الجزائرية عبارة عن شعر شعبي يكون بمثابة الفال وليست هذه اللعبة التراثية سوى أشعار شعبية
- جزائرية
- المهم البنات تعقد نية سماع البوقالة على شخص
- و هدا يتم بان تمسك بجزء من خمارها أو تنورتها أو أي قطعة قماش أمامها وتصنع منها عقدة صغيرة مرة
- واحدة قبل أن تفتح هذه العقدة بعد الاستماع إلى البوقالة والكشف إن أرادت عن اسم الشخص الذي نوات
- بعد ما تعقد كل بنت نية سماع البوقالة تقوم احدى العجائز بقول بوقالة وكل البنات مصغيات فاذا كانت
- البوقالة جميلة
- وفالها حلو تجد كل الفتيات متشوقات حتى يعرفن من صاحبة البوقالة الجميلة وكل وحدة تتمنى تكون هي
- صاحبتها واذا
- كانت البوقالة كلامها فال سىء او حزين فتجد كل واحدة خائفة من ان تكون هي صاحبة البوقالة ....
- و اليوم رايحين نلعبو البوقالات مالا انووا .......خلي نزهو الحالة
- ماتخافوش على خواتمكم ههههههههههههه....خيرو رقم من 1 الى 50 .............
- باسم الله بديت ** وعلى النبي صليت
- وعلى الصحابة رضيت ** وعيّطت يا خالقي
- يا مغيث كل مغيث ** يا رب السماء العالي
- و هده بوقالة لكل اعضاء المنتدى\"
- فال يا فلفال يا فاتح سبع قفال
- اجبرلي سعدي مهما كان
- ما الشرق و لا من الغرب
- ولا من الشمال
- \'\'\'\'\'قولو للي ضاق صبرو يشد في حبال الرجا و علاش يتنكد ..يتكل على الله ياك ربي العالي ما يضيع
اعمال يدوية، اشغال يدوية، كروشى، اعمال فنية، اشغال يدوية بالصور، اعمال فنية بسيطة، اشغال فنية، اعمال يدوية بالصور، اعمال فنية يدوية، اعمال يدوية بسيطة، اعمال يدوية سهلة، اشغال يدوية منزلية، اشغال يدوية سهلة، اعادة تدوير الأشياء، اعادة تدوير ,اشغال يدوية للمنزل, اشغال يدوية للعروس , ورود بالقماش , اعمال يدوية وافكار ,عمال فنية يدوية, اعمال فنية بسيطة, هاند ميد, كروشيه بالصور